方言与戏曲(音视频)|黄俊豪:丑生王——梁醒波(广州海珠土华话)

梁醒波，粤剧文武生，后改丑生。戏行中人都亲切地喊他“波叔”。广东南海人（一说马来西亚吉隆坡），出生于新加坡为梨园世家。父亲梁悦亦是粤剧名伶，艺名声架悦。

波叔佢醉心粤剧，17岁嗰年，说服佢老豆，俾佢去马来西亚啲城市跟“大胆根”学戏。十八岁第一次上台，喺星马各地演小武，越做越红，係南洋四大天王之一。佢钟意唱马师曾腔，冇几年就喺星马粤剧界闯出名堂。过咗几年，省港大老倌马师曾带团去怡保演出，就识咗梁醒波。到咗四零年，马师曾喺香港嘅太平剧团缺人，专登请梁醒波加入，波叔觉得係个好机会，就带埋老婆同个女一齐嚟香港。1939年到香港演出，后来日军占领香港，就周围走难，到内地流徙，等到香港光复之后，佢同谭兰卿拍档，自己组咗个“花锦绣”剧团。之后因为佢开始发福，就转行演丑生，呢个转变，令粤剧界多咗一位“丑生王”。佢先后喺“仙凤鸣”、“大龙凤”、“雏凤鸣”几个剧团演出，佢天生就识得氹人笑，啲插科打诨真係出神入化。波叔讲过：“做丑生最紧要係两样嘢：第一就係‘爆肚’同‘执生’，唔可以死跟剧本，观众有兴趣就做多啲，如果观众冇乜反应就要即刻转话题；第二就係表情要‘生鬼’、要夸张，用夸张嘅演法令观众有共鸣，带住观众嘅情绪走。”

波叔喺香港，同任剑辉、白雪仙佢哋喺“仙凤鸣剧团”演出名剧，好似“牡丹亭”、“紫钗记”、“蝶影红梨记”、“再世红梅记”等等。由1950年到1977年之间，佢主演或者参演咗差唔多400部粤语电影，自己又开过“利影”、“达丰”呢啲电影制作公司。到咗1967年，佢又做埋无线电视大型综合节目“欢乐今宵”嘅主持，好受大众欢迎。波叔先后做过粤剧八和会馆四届主席同两届会长。1977年，英女王颁咗个MBE勋衔俾佢，係香港艺人入面第一个攞到呢个荣誉嘅。讲起佢把声，最初做文武生嗰阵时把声比较粗阔，带少少“沙声”，但就好雄壮，字字清楚；后嚟转做丑生之后，就越嚟越口齿伶俐，韵味十足。佢由三十九岁开始，前后拍咗超过三百部普通话同广州话电影，又灌录过唔少唱片。1967年6月，香港无线电视台开台，梁醒波就已经係开国功臣之一。佢喺“欢乐今宵”呢个集歌舞、趣剧、游戏于一身嘅综合节目里面，一做就做咗十几年主持。梁醒波亦都好热心为同业谋福利，做过香港八和会馆主席。到咗1977年4月13号，港督麦理浩爵士代表英女王正式颁授MBE勋衔俾梁醒波，以表扬佢嘅艺术成就。

梁醒波嘅做人道理好简单，同人相处唔使太计较，佢同“上流社会”嘅人打交道，又同街边小贩、打工仔嗰啲人倾偈。佢觉得：“熟悉人哋嘅生活，同佢哋做朋友，係一件开心事，对塑造角色都好有帮助。”波叔咁受广大观众欢迎，或者都说明到一个道理，就係佢好为他人着想。佢嘅代表作包括：“紫钗记”、“再世红梅记”、“帝女花”等等。到咗1981年，梁醒波因为脑癌喺香港过身，享年73岁。佢三个女都係知名艺人，包括：电视艺员梁葆贞（佢扮处境喜剧“香港八一”入面嘅“顺嫂”好出名）、粤语片演员文兰，同粤剧演员梁宝珠（梁宝珠同陈宝珠曾经夹份组过“孖宝剧团”）。

本期编辑 | 黄俊豪

本期审读 | 熊喜婷

责任编辑 | 甘于恩

投稿邮箱：ohyfy@163.com

文章版权归语言资源快讯所有，转载请注明出处

图片视频来源 | https:bilibili.com

方言与戏曲（音视频）｜黄俊豪：武生王——靓次伯（广州海珠土华话）

方言与戏曲（音视频）｜黄俊豪：慈善伶王——新马师曾（广州海珠土华话）

广府文化（音频）|陈悦蕾：请接收由老广寄来的过夏消暑小秘方（广州话）

方言诵读经典（音频）| 汤宝仪：唐-杜牧《山行》（广州话）

•

做语言资源保护公众号不容易，每天更新公众号更不容易，而每天提供新语料尤其不容易。很多读者还没养成打赏习惯，提倡每个月打赏一元，积少成多，我们的事业就有希望。感谢各位！